"Ауғанның от жалыны" тақырыбында ауған соғысына қатысқан ардагерлермен кездесу

Мектепте 2023 жылдың 13 ақпан күні Кеңес әскерлерінің Ауғанстан жерінен шығарылғанына 34 жыл толуына орай және білім алушыларды әскери-патриоттық сезімде тәрбиелеу мақсатында  "Ауғанның от жалыны" тақырыбында ауған соғысына қатысқан ардагерлермен кездесу болып өтті. Кездесуге Меркі ауданының ардагерлері Б.Бекжанов, Е.Сеңгербаев, Т.Кахраманов қатысты. Кездесуді мектеп директоры Е.А.Далиев құттықтау сөзбен ашты. Ол өз сөзінде ауған соғысының тарихы жайлы баяндап өтті. «Біз білім алушыларымызды өз Отандарын сүюге, қазақ елінде туып-өскендерін мақтан тұтатындай етіп, патриоттық рухта тәрбиелеуге тырысамыз. Қазіргі бейбіт заманның өзінде де жер шарының бір бұрышында соғыс өрті лаулап, онда жазықсыз жандардың мерт болып жатқанын, соларды қорғау жолында біреулер асқан ерлік көрсетіп жатқанын бүгінгі ұрпақ білуге тиіс. Осыған орай әскери-патриоттық тәрбие аясында өткізіліп отырған бүгінгі іс-шараға қатысуға тілек білдірген ардагерлерге мың да бір алғыс айтамын», – деді. Кездесуде білім алушыларымыз өз өнерлерін ортаға салды. Білім алушыларымыз көкейде жүрген сұрақтарын ардагерлерімізге қойып, еркін пікір алмасты.